ثيبراتين ن بولوس إ إمومنّ ن ثمدينين ن أفاسوس د فيليبّي
أفاسوس ثكّا ثݣا يوث ن ـ ثمدينث نّامي يمقّور وادّور. ثوساد خف يير ن ـ لبحر ݣ ـ ؤغلّوي ن ـ ثمازيرث ن ـ أسيا ثامژّيانث (توركيا دغي ).
ئكّاتّيد ؤمازان بولوس ثيكّلث ثامزواروتّ ݣ ـ ثوادا نس ثيسّ سناث نّاݣ أر ئتبرّاح س ـ ئنغميسن ژيلنين (ئسكّين نّا ݣان ئمازانّ 18: 19ـ21). د ݣ ـ ثوادا نس ثيسّ شراطّ (ئسكّين نّا ݣان ئمازانّ 19) ئقّيمانّ ديكس شراض ن ـ ئسݣّاسن أر ئسّلماد أݣراو ن ـ ئمومنّ نّا يسمون ديسّ.
د ـ لشثاب أد ݣ ـ لعاهد ؤجديد ( ثاضا ثوجديتّ) نّا غر ئلّا ييسم ن ـ ثمدينث أد، نتّا ثابراتّ نّا ياري ؤمازان بولوس ئي ؤݣراو ن ـ ئمومنّ نّا يلّان ديسّ.
ݣ ـ ثبراتّ أد، داسن ئتقّيس بولوس، أراخ ئتقّيس أود نوكني، مايد ئݣا سيدنا عيسى غيفنخ د ـ ميمش أيداخ ئرا أنيدير. أراخ ئسنعاث رّحمث ن ـ ربّي، د ـ ؤينّا يعوّل أد ئيݣ حما أد ئفوكّو ميدّن ن ـ لݣنوس ن ـ دّونيث س ـ ماس ثلّا. أراخ ئسنعاث ألثو ميمش أيد ئخصّا أتّيلي ثامونتّ ئتݣر ن ـ ميدّن ن ـ ربّي، د ـ ميمش أيد ئخصّا أنكّس لمعصيث أها نمنو داث ن ـ ربّي.
ئسيول بولوس ألثو ݣ ـ ثبراتّ أد أود خف ميمش أيد ئخصّا ئي يرݣزن د ـ ثوثمين نسن أد مييرين اها موقّارن ئنݣراتسن، د ـ ميمش أيداخ ئخصّا أنيلي نوجد أننّال ثيثيوين ن ـ ئبليس.
فيليبّي ثكّا ثݣا يوث ن ـ ثمدينث نّا ستعمرن رّومان. ثوساد ݣ ـ ؤژلماض ن ـ ثمازيرث ن ـ ماكيدونيا ( ليونان دغي ).
ݣ ـ ثوادا نس ثيسّ سناث، ئسمون بولوس د ـ ئسمونّ نس أݣراو ن ـ ئمومنّ أمزوارو ݣ ـ ثمازيرث ن ـ ؤروبّا (ئسكّين نّا ݣان ئمازانّ 16 : 12 ـ 40 ).
د ـ لشثاب أد زݣ لعاهد ؤجديد ( ثاضا ثوجديتّ) نّا غر ئلّا ييسم ن ـ ثمدينث أد ن ـ فيليبّي، نتّا ثابراتّ نّا ياري ومازان بولوس ئي وݣراو ن ـ ئمومنّ ديسّ. ئرا أثن ئسنومّر خف ثرزّيفث نّاس ؤزنن، د ـ خف ؤسعاون نّا ثسعاونن اد ئبرّح س ـ ئنغميسن ژيلنين.
ݣ ـ ثبراتّ أد داخ ئسّلماد ؤمازان بولوس ميمش أيداخ ئخصّا أنفرح، نحمد ئي ربّي أها ؤر نتّاسي أنزݣوم. ؤر نسخاثار س ـ ئخخفاون نّخ مشان أنحاسب وييّاض ئيس أخ ؤفن أها نزّوور نّفع نسن خف وينّخ.
أر نتّيسين ألثو ݣ ـ ثبراتّ أد ميمش أي نّيزري لماسيح أنسا ن ـ لعزّ يدّود غر دّونيث أد أها يضاع أود أد ئمّث خف ئحنيݣن ن ـ ؤطّورق، د ـ ؤفوكّا ؤر ئيد س ـ لاعمال مشان س ـ سيدنا عيسى لماسيح، د ـ نوكني أيث ييݣنّا أيد نݣا.