إسقسيتن د تريرا نسن

“قّاح ؤنّا إغـران إ ييسم ن سيدنا عيسى أد إتّوفوكّو” إسكّـينّ نّا ݣان إمازانّ 2 : 21

 

 

 

 

ماي نْمَس نوكني؟

نوكني إمومن إمازيغـن إمسيحين نّا إݣان نّييْت نسن ݣ ربّي أها تْوَكّلَن خف واوال نس نّا إلّان ݣ لشتاب إقـَدّسن حما أداخ إݣوّد ݣ تودرت نخ.   لا نتّيري أ نّتفور سيدنا عيسى لمسيح أها نݣ س واوال ن لإنجيل. لا نتّامن إس لشتاب إقـَدّسن ماشي أم لشتُب ياضن ماشان نـتّا أوال ن ربي أيد إݣا (2 تيموتاوُس 3:16 ) نّا إساوالّ إ ميدّن كول ݣ دّونيت، إنݣراسن إمازيغـن.

ما دا نتّعباد نوكـني؟

لا نتّعباد ربّـي إويل نس غاس نـتّا نّاد إدّان غورخ س إسم ن سيدنا عيسى لمسيح أوال نس حما أد إعيش إنگـراخ أها يوش تودرت نس حما أد إغفر دّنوب ن ميدّن كول د إمازيغـن أگيدسن.   لا نتّعباد ربي س رّوح نس د كول لحقّ ن واوال نس نّا إلّان گ لشتاب إقـَدّسن (يوحنّا 4: 24).   سّغد إ لباراميج ن رّاديو س تمازيغت گ لانتيرنيت : « ماتـّا نتـّا سيدي ربّي؟ 1» د « ماتـّا نتـّا سيدي ربّي؟ 2   فرّج س لموسيقى :  
 

ماي دا نورزّو؟

لا نتّيري أ نّسباين أها نـَنعت إ لّومت نخ ن إمازيغـن لقوّا تاروحيت ن لشتاب إقـَدّسن.   أمشيد كو يوك زيگـنخ أد ييلي غورس رّاي نس نّا إبنان خف لحقّ ن واوال ن ربّي. إدّخ س لشتاب إقـَدّسن كو يوك أد ييغـييْ أد ييسين ربي أها إبنو ليمان نس خف لْساس إصحان. لا نتّيري أداون نغـر غـر لمسيح حما أ تّيلي غورون يوت ن لعلاقا تاكسْواتّ أگيدس نـتّا نّا إنـّان : « نك أيد إگان أبريد د لحق د تودرت. أگّد يوك ؤر إتّيغـييْ أد إدّو غـر إبّا (زعما ربي) بلا نكّين » (يوحنّا 14: 6).   لازم أ نّيسين إس إبليس (شيطان) لا إتّيسين مزيان ميمش إعـدّال شيگان ن إبردان إتشاباهن أبريد ن لحق نّا إتّاوين غـر ربي (2 كورِنتوس 11: 14).   فرّج س لموسيقى:    
 

ماتّا نتّا إبليساد، أعداو ن ربّي د ميدّن؟

4. ماتّا  نتّا  إبليساد،  أعداو  ن  ربّي  د  ميدّن؟ ربي  إخلق  شيگان  ن  لملايكات  گ  إگـنّا  إ  لخدمت  نس.  شيطان  نـتّا  أيد  إگان  لملاك  أخاتار  نّا  إقـرّبن  إ  ربي.  ألـّيگ  يانّاي  أنسا نّاس  يوشا  ربـي  أها  ياف  وول  نس  ييري  أد  يامژ أنسا  ن  ربي (إشَعْـيا  14: 14)، إرا  أد   إنگـلب  خف  سيدي  ربي  نّات  إخلقـن. سيدي  ربي  گ  تـزدگي  نس  ؤر  دا  إتـَّـقبال  رّاي  أم  واد.  داي  إگر  س  إبليس  علا  برّا  ياويد  أگيدس  شيگان  ن  لملايكات  نّات  إتفورن. داي  إگ أگيدسن  يوك  ؤجمّوع  ن  إد  إبليس إعدّان  نّا  إتعـكّاسن  لخدمت  ن  ربي  گ  دّونيت  كول  أل  ؤسّان  نّاد  نوسا. ألّيگ  يانّاي  إسْد  ييوي  أگيدس  شيگان  ن  لملايكات  زگ  إگـنّا،  إرا  أد  إگ  أمشيس  نـّيگ  ن  واشال  س  لخليـقـت  ن  ربي  س  ؤماتا  بنادم  نّا  إخلق  سيدي  ربي  خف  سّيفت  نس. سّغد  إ  لبرنامج  ن  رّاديو  س  تمازيغت  گ  لانتيرنيت : « لملايكات  د  إبليس ».

ماتـّا نتّا بنادم، لخليقت ن ربّي إسّدهاشن؟

بنادم  نـتّا  أيد  إگان  لخليقت  نّا  إعدل  ربي  خف  سّيفت  نس (تيزويري  1: 26 ـ 27).  ميمش؟ سيدي  ربي  إخلق  بنادم  س  وول  حما  أد  ييري سيدي  ربي.  سيدي  ربي  إخلق  بنادم  س  وانلي  حما  أد  إمساوال  د  ؤنّات  إخلقن.  سيدي  ربي إخلق  بنادم  إحُرّا  حما  أد  إختار  أد  إعبد  سيدي  ربي.  أدم،  أرياز  أمزوارو،  إكّا  إغييْ  أد  إضاع  ربي  گ  وول  نس  د  لفعايل  نس  كول.  إكّا  إغييْ  أد  إعـيش  گ  لهنا  د  لمان  نـتّا  د  سيدي  ربي  نّات  إعدلن. سيدي  ربي  إخلق  بنادم  إ  لعزّ  نس،  ماشا  دّنوب  ؤر  ؤدجين  بنادم  أد  إفرح  س  ؤنّات  إخلقن.  ميمش؟  غر  أينّاد  إدّان. سّغد  إ  لباراميج  ن  رّاديو  س  تمازيغت  گ  لانتيرنيت : « ماتـّا  نتـّا  بنادم؟ 1 » د « ماتـّا  نتـّا  بنادم؟ 2 ». فرّج لفيلم :

مايد إگان دّنوب؟

ضارت  ن  مايد  إخلق  ربّي  أدم  د  حُوّاء, تمطـّوط ّ  نس، إدّود  غورسن  إبليس  دغيا  أها  إبدو  أر  إساوال  إ  تمطـّوط ّ  حما  أد  إسّخسر  لعلاقا  نّا  إلّان  إنگراسن  د  ؤنّاتن  إخلقن  (تيزويري  3:1). س  تحراميات  نس  ييوض ألّيگ  إكشم  ؤل  ن  بنادم  نّا  إران  نّيت  أگّد  نـتّا  أد  إگ  أم  ؤنّات  إخلقن،  أد  يـيـسين  لخير  د  شّـر  (أينّا  إژيلّ  د  ؤينّا  ؤر  إژيلّ) (تيزويري  3: 5). ألّيگ  إعصا  بنادم  لوصيت  ن  ربـي  نّا  إسّحرمن  غيفس  أد  إتش  زگ  تخليدجت  ن  توسنا  ن  ؤينّا  إژيلّ  د  ؤينّا  ؤر  إژيلّ، (تيزويري 2: 17) ديس  أيد  إدنب  ضدّ  ن  ؤنّات  إخلقن. دّنوب  ماشي  غاس  أدّايْ  إعصا  بنادم  ربي  س  رّاي  نغد  س  لفعايل،  ماشا  دّنوب  نيتـني  لأصل  نغد  تغبالوت  نّا  زگ  داد  تـّـدّون  إخمّيمن  نّا  ياكّان  لفعايل  ؤر  إژيلّ  دات  ن  ربي.  دنوب  نيتـني  أدّايْ  ؤر  يگي  بنادم  أينّا  خفت  إخلق  ربي  حما  أد  إمجّد  ؤنّات  إخلقن. دنوب  لاد  تّاوين  لموت،  وَلايّْـنّي  س  تـيتّ  لموت  أيد  إگان  لخلاص  ن  دّنوب  (تبرات  ن  روما  6:23). سّغد  إ  لباراميج  ن  رّاديو  س  تمازيغت  گ  لانتيرنيت : « دّنوب » .

ماتّا نتّات لموت، أعداواد نّا إسّخلاعن ميدّن كول؟

ضارت  ن  مايد  إخلق  ربّي  بنادم،  إسّحرم  غيفس  أد  إتش  زگ  لغلّت  ن  تخليدجت  ن  توسنا  ن  ؤينّا  إژيلّ  د  ؤينّا  ؤر  إژيلّ،  حما  أد  ور  إمّت  (تيزويري  2: 17).  والايـْـنّي  بنادم إختار  إ  إخف  نس  أد  إتفـور  رّاي  ن  إبليس  أعداو  نس  أها  إعصو  ؤنّات  إخلقن (تيزويري  3: 6).  س  لفعايلاد  بنادم  إسّخسر  لعلاقا إنگراس  د  ربي  يافـن  إخف  نس  إبعد  إ  ؤنّات  إخلقن،  تاد  أيد  إگان  لموت  تمزواروت  (لموت  تاروحيت) (تبرات  ن  أفـَسُس  2: 1). زگ  لوقـتـنّا  لموت  تيس  سنات  (لموت  ن  دّات) لا  تخدّم  گ  بنادم  ألت  ترار  غر  أشال  أمشينـّاد  إنّا  لحشام  ن  ربي : «...إدّخ  تـفّـغـد  زگ  واشال  أ  تـّعايد  غر  أشال » (تيزويري  3: 19).  إد  لموت  تيس  شراط ّ  (أهلاش  ن  وابدا)  أدّ  تـدّو  ضارت  ن  واسّ  أخاتار  ن  لحشام  ن ربي.  والاينّي   س  لمحيبّا  ن  ربي  د  نّعـمت  نس،  نـتّا  إرا  أد  إفوكـّو  بنادم  زگ  لموت (يوحنّا  11: 25 ـ 26)  أها  إعدل  يوت  ن  لعلاقا  توجديتّ  إنگراسن  نـّا  إبنان  خف  لعمل  ن  سيدي  ربي  ماشي  خف  لفعايل  ن  بنادم.

مايد إݣان نّعمت ن ربّي؟

نّعمت  ن  ربي  ماشي  غاس  أغروم  د  ووتشي  أيت  إگان،  ماشا  توكّي  نس  نّا  ؤر  إستاهل  بنادم  أها  يوشاست  سيدي  ربي  س  تايري  نس. توكّيـياد  لات  ياكّا  ربي  إ  كول  إمعصي  نّا  إتوبن  زگ  لفعايل  نس،  نتّات  أيد  ياكّان  أفوكّو  إ  ميدّن  (تبرات  ن  تيطُس  2: 11،  تبرات  ن  أفـَسُس  2: 5، 8)  أها  إتّوبرّار  فابور  (تبرات  ن  روما  3: 24،  تبرات  ن  تيطُس  3: 7). ربي  س  تايري  نس  د  رّحمت  نس  (يوحنّا  3: 16،  تبرات  ن  أفـَسُس  2: 4 ـ 5)  أس  إسراح  بنادم  زگ  لعقوبيت  نّاد  ييوي  غيفس  إبليس  أعداو  نس  أمزوارو.  ماشا  سيدي  ربي  لامين  أيد  يگا  أها  إعدل  گ  لحشام  نس  إزدّيگ  ؤر  دا  إتـّقبال  دّنوب.  لا  إتّيري  بنادم  ماشا  لا  إشرّه  دنوب  ن  بنادم. أياد  أخف  إلازم  شا  ن  يوك  أد  إخلّص  تّمن  ن  دنوب  گ  وانسا  ن  بنادم.  شا  ن  يوك  نّا  ؤردجين  إدَنـْبَن  أها  ييري  أد  إمّت  گ  وانسا  ن  بنادم  إمعصي. ألّيگ  ؤر  يوفي  سيدي  ربّي  شا  ن  بنادم  بلا  دنوب  (تبرات  ن  روما  3: 23)  أها  إغرس  إ  ؤعلّوش  نّا  ؤر  إلّي  شا  ن  لعيب  حما  أد  إفوكّو  تامكروست  نّاد  إگا  أدم  د  حواء  س  لمعصيت  نسن.  أعلّوشـنّاد  لا  إتمتّال  أفـكّاك  ن  دّونيت  نّا  إعوّل  أدّ  إدّو  گ  لوقت  نّا  تختار  لحكما  ن  ربي  حما  أد  إشمّل  أفوكّو  نّيگ  ن  صّليب  (نغد  إسيگـَل). فرّج لقيست نـّا إعاود سيدنا عيسى خف نـّعمت ن ربّي:

مايد إگان أفوكّو/ أفّوكّا ؟

أفوكّو  نتّا  أدّاي  إفدا  سيدي  ربّي  بنادم  إمعصي  نّا  يومنّ  گ  دّبيحت  ن  سيدنا  عيسى  نّيگ  ن  صّليب  (إخلّص  غيفس  س  إدامّن  ن  ؤفكّاك).  ربي  لا  إتفوكّو  ؤنّا  يومن  گ  ؤفكّاك  نّا  إمّوتن  نّيگ  ن  صّليب (نغد  إسيگـل)  حما  أد  ياسي  دّنوب  ن  دّونيت  كول.  لا  إتّاغول  ؤمومن  ياريد  زگ  دنوب  نس  س  إدامّن  ن  لمسيح  إنغالّ  نيگ  ن  صّاليب (تبرات  ن  إعـيـبرانين  9: 12،  أنورژَم  ن  إگـنّا  1: 5).  خف  ؤفكّاكاد  سيدنا  عيسى  أخف  دا  إساوال  لشتاب إقدّسن  زگ  تيزويري  أل  تينگيري. سّغد  إ  لباراميج  ن  رّاديو  س  تمازيغت  گ  لانتيرنيت : « مايدي  إلازمن  أت  گخ  حما  أد  فوكـّوخ؟ ». فرّج س لموسيقى خف لمِتال ن ﺅفوكـّو:

مايد إݣان لشتاب إقدّسن؟

لشتاب  إقدّسن  نتّا  أيد  إگان  لشتاب  ن  واوال  ن  ربّي  نّا  يوشا  إ   إمازانّ  نس  س  رّوح  نس  حما  أتّيد  أوين  إ  ميدّن.  لشتاباد  أ  داخ  إتـّنعاتن  ماتّا  نتّا  ربي،  د  ماتّا  نتّا  بنادم  أها  إنعتاخ  ألتو  أبريد  إسّاواضن  بنادم  غر  ربي.  لشتاباد  إحضات  ربي  س  لقوّا  نس  لا  زگ  ؤژَوَّر  ن  بنادم  وَلا  زگ  ؤحرّاف  ن  إبليس. لشتاب  إقدّسن  إگا  يوت  ن  لخيزانا  نّاگ  إلّا  66  ن  لشتاب.  لا  إبطّو  خف  سين  إلان:  إلي أمزوارو  إسم  نس  تاضا  تاقديمت  (نغد  لعهد  أقديم)، د  إلي  ويس  سين  إسم  نس  تاضا  توجديتّ  (نغد  لعهد  ؤجديد). تاضا  تاقديمت  (لعهد أقديم)  ديگس  39  ن  لشتاب: خمسا  ن  لشتًب  ن  موسى  نغد  تورات: ـ لشتاب  ن  تيزويري ـ لشتاب  ن  ؤفوغ ـ لشتاب  ن  أيت  لاوي ـ لشتاب  ن  لحساب ـ لشتاب  ن  ؤعاود  ن  شّـريعا تناعش  ن  لشتاب  ن  تّاريخ  نّا  إساوالّ  خف  تّاريخ  أقديم  ن  شّعب  ن  إسرائل  تاروا  ن  براهيم  أمدّاكـّل  إعزّين  ن  سيدي  ربي: ـ يَشوع ـ إمغارن ـ راعوت ـ لشتاب  أمزوارو  ن  صَموئيل ـ لشتاب  ويس  سين  ن  صَموئيل ـ لشتاب  أمزوارو  ن  إگـلدان ـ لشتاب  ويس  سين  ن  إگـلدان ـ لشتاب  أمزوارو  ن  لمَجرييات ـ لشتاب  ويس  سين  ن  لمَجرييات ـ عِزْرا ـ نَحَمْيا ـ أسْتير خمسا  ن  لشتُب  ن  شِّعر  د  إهلّيلن: ـ أيّوب ـ زّابور ـ لأمتال ـ لجاميعا ـ تـَنـشّاتّ  ن  تـَنـشّادين سبعطاش  ن  لشتاب  ن  لانبيا: ـ إشَعْيا ـ إرْمِيا ـ أغْـريب  ن  إرْمِيا ـ حِزْقيال ـ دانْيال ـ هوشَع ـ يوئيل ـ عاموس ـ عوبَدْيا ـ يونس ـ ميخا ـ ناحوم ـ حَبَقـّوق ـ صَفَنْيا ـ حَجّي ـ زَكَرِيا ـ مَلاخي سّغد  إ  لباراميج  ن  رّاديو  س  تمازيغت  گ  لانتيرنيت : لانبيا  د  لشتاب  إقدّسن فرّج لفيلم: تاضا  توجديتّ  (لعهد  ؤجديد)  ديگس  27  ن  لشتاب: ربعا  ن  لشتًب  إساوالن  خف  تودرت  ن  لمسيح: ـ لشتاب  ن  مَتّى ـ لشتاب ن  مَرْقُس ـ لشتاب ن  لوقا ـ لشتاب  ن  يوحَنّا لشتاب  نّا  إتقّيسن  خف  تيزويري  ن  ؤعدّول  ن  إ گْراون  (نغد  إجمّوعن)  إمسيحين: ـ إسكّينّ  نّا  گان  إمازانّ واحد  و  عشرين  ن  تبراتّ  إتَلّمادن  إ  إمومنّ  سْبورْزَنتن  أها  عـزّانتـن  گ  وامّاس  ن  تيموكراس  نّا  إتكّان  غيفسن  تانيلا  ن  ليمان  نسن  گ  ؤنّاتن  إختارّ  حما  أتن  إبارش: ـ تبرات  ن  روما ـ تبرات  تمزواروت  ن  كورِنْتوس ـ تبرات  تيس  سنات  ن  كورِنْتوس ـ تبرات  ن  غَلاطِيا ـ تبرات  ن  ﺅفسوس ـ تبرات  ن  فيليبّي ـ تبرات  ن  كولوسّي ـ تبرات  تمزواروت  ن  تَسالونيكي ـ تبرات  تيس  سنات  ن  تَسالونيكي ـ تبرات  تمزواروت  ن  تيموتاوُس ـ تبرات  تيس  سنات  ن  تيموتاوُس ـ تبرات  ن  تيطُس ـ تبرات  ن  فـِليمون ـ تبرات  ن  إعيبرانين ـ تبرات  ن  يَعْقوب ـ تبرات  تمزواروت  ن  بُطْرُس ـ تبرات  تيس  سنات  ن  بُطْرُس ـ تبرات  تمزواروت  ن  يوحَنّا ـ تبرات  تيس  سنات  ن  يوحَنّا ـ تبرات  تيس  شراط  ن  يوحَنّا ـ تبرات  ن  يَهودا لشتاب  ن  أنورْژَم  لا  إساوال  خف  لوقت  نّاد  إدّان: ـ أنورْژَم  ن  إگـنّا كول  لشتُب  ن  لشتاب  إقدّسن  بضان  خف  إمورن،  د  إمورن  بضان  خف  لّايات  حما  أد  إوهن  أد  ياف  بنادم  أينّاخف  يورزّو  گ  لشتاب. لاون  نتمنّا  تغوري  إژيلّ  د  ليمان  نّا  إتبدّالن  تودرت  نون  س  لمسيح  نتّا  نّا  إنّان:  « ماشي  غاس  س  ؤغروم  أس  إتعيش  بنادم،  ماشا  س  كول  إواليون  نّاد  إتفّغن  زگ  إمي  ن  ربي ». (متّى 4: 4).  سّغد  إ  لباراميج  ن  رّاديو  س  تمازيغت  گ  لانتيرنيت : ألمّد  د  لوصيات  ن  لشتاب  إقدّسن 1  د  ألمّد  د  لوصيات  ن  لشتاب  إقدّسن 2 فرّج لفيلم:

ماخف ألّيݣ إلّا لشتاب إقدّسن د مامي إتّـييازن؟

أوال  ن  ربّي  نّا  إلّان  گ  لشتاب  إقدّسن  إتـّييازن  إ  ميدّن  كول  حما  أد  إسينّ  أبريد  نّا  إسّاواضن  غر  ربي.  لشتاب  إقدّسن  إتـّييازن  إ  تقبيلين  كول  زيگسنت  تيقبيلين  ن  إمازيغن:   « إدّخ  قاح  ؤنّا  يورزّون  أداس  إتّوش،  د  ؤنّا  إتـقـلّابن  أد  ياف،  أها  إنّورژَم  إ  ؤنّا  إدّوقّان » (متّى 7: 8).  « س  تيتّ  إمقّور  سِّر  ن  تّـقْوا:  ؤنّاد  إدّان  گ  دّات،  إتّوبرّار  س  رّوح،  أنّاينتّ  لملايكات،  تّوخبّرن  إسّ  ميدّن  كول  (أگّد  إمازيغن)،  أمنّ  إسّ  گ  دّونيت،  أها  إتّوعلّا  گ  لعـزّ » (تبرات  تمزواروت  ن  تيموتاوُس  3: 16). لشتاب  إقدّسن  لاخ  إتـّنعات  ربي  گ  تايري  نس  أها  يوشاخ  لإنجيل  ( أنغميس  إژيل )  د  لبركات  نّاد  إتدّون  زيگس:  إدّخ  أمشي  أيد إرا  ربي  ميدّن  أليگ  يوشا  ممّيس  أفردي  ( سيدنا  عيسى  لمسيح )  حما  قاح  ؤنّا  إسّ  يومنّ  ؤر  إتمتات  شا  ماشا  أ  تّيلي  غورس  تودرت  ن  وابدا  (راعا  يوحنّا  3: 16.). سّغد  إ  لباراميج  ن  رّاديو  س  تمازيغت  گ  لانتيرنيت :  « شا  ن  إواليون  إهمّان  خف  لشتاب  إقدّسن ».

ما دا إتعنو واوال ن لإنجيل؟

لإنجيل  يوك  ن  واوال  نّا  دا  إتعنون  « أنغميس  إژيلّ  نغد  إسّفراحن »:  ربّي  لاخ  إتّيري  ألّيگ  يوشا  أوال  نس  أفردي  نّيگ  ن  صّليب  حما  أد  إفوكّو  لأرواح  نخ  زگ  ؤهلاش  ن  وابدا  (راعا  يوحنّا  3: 16.).  واد  أيد  إگان  لإنجيل  ن  نّعمت  ن  ربي  (راعا  إسكّينّ  نّا  گان  إمازانّ  20: 24.)  تانيلا  ن  ميدّن  إمعصيتن.  أنغميس  نس  لا  إقـّار  إ  ميدّن  حما  أد  أمنّ  گ  سيدنا  عيسى  لمسيح  د  لموت  نس  د  تانشرا  نس  إنگر  إمتّين  حما  أداسن  تّوغفران  دّنوب  نسن  (تبرات  تمزواروت  ن  كورِنتوس  15: 1 ـ 4). لإنجيل  أيد  إگان  يوك  إسم  نـّاد  يوسان  إ  ييل  ويس  سين  ن  لشتاب  إقدّسن،  نّا  إتّوسمّان  ألتو  تاضا  توجديتّ. فرّج لافلاما:

ماخف ألّيݣ لّان ربعا ن إد لإنجيل؟

گ  لحقيقا  ؤر  إلّي  غاس  يوك  ن  لإنجيل  نتّا  أيد  إگان  أنغميس  إس  أ  تّـيغـيـيْـت  أ  تّـفوكّوت  زي  دّنوب  نش  س  مايد  إگا  لمسيح  تانيلا  نش.  لا  إتّيني   لشتاب: « إكّا  لمسيح  لا  إتدّو  أر  إتخبّار  ميدّن  س  لإنجيل  ن  ربّي » (مَرْقـُس  1: 14). ألّيگ  دا  ساوالن  ربعا  ن  لشتُب  إمزوورا  ن  تاضا  توجديتّ  ( لعهد  ؤجديد)  كول  نسن  خف  لمسيح  كو  يوك  زگ  يوت  ن  تامناط ّ  إخصّان  ( لوقا  1: 1 ـ 4) ،  أنّاين  إمومنّ  إمزوورا  أد  زايدن  إسم  ن  لإنجيل  إ  ييسم  ن  ؤمحضار  نّاد  ييوين  أوال  زگ  سيدي  ربي.  أمشيد  لا  نتّيني  إ  لشتاب  ن  متّى  لإنجيل  ن  متّى،  وين  مَرْقـُس  لإنجيل  ن  مَرْقـُس،  وين  لوقا  لإنجيل  ن  لوقا،  د  وين  يوحَنّا  لإنجيل  ن  يوحَنّا. أمشيد  إدّخ  كول  لشتاب  ن  تاضا  توجديتّ  نتّا  أگ  إلّا  ؤنغميساد  د  ؤفرويْ  نس،  أياد  أخف  دا  إتوسمّا  ييتس  ن  تِكّال  س  لإنجيل،  س  ؤماتا  گ  تميزار  ن  واعربن  د  تين  إمازيغن.

إد س تيتّ إتّوژوّر لشتاب إقدّسن؟

ألاواه،  ألاواه،  ؤنّا  إتّينين  أوالاد  هات  أعاير  ن  إبليس  إ  ربّي  أيد  إگا  ماشي  إ  إمسيحين  نغد  ؤداين. هان  ما  دا  إتّيني  ربي  خف  واوال  نس:  « داي  إنّايي  مولانا:  إس  تانّايت  مزيان،  هات  نكّ  لا  تمويودخ  خف  واوال  إنو  أرتّ  شمّلخ »  (إرْمِيا  1: 12).  سيدي  ربي  ؤر  دا  إگـّان  أمشينّا  إرا  إبليس  أد  ييني  إ  شيگان  ن  ميدّن.   ربي  لا  إتمويود  خف  دّونيت  كول  س  ؤماتا   أوال  نس،  إدّخ  إسّن  إس  إبليس  أعداو  نس  ؤر  إري  أت  إسينّ  ميدّن  أها  أمنّ  إسّ. أوال  ن  ربي  لحقّ  أيد  إگا  (يوحنّا  17: 17)،  إگ  ألتو  رّوح  د  تودرت  (يوحنّا  6: 63).  أياد  أخف  ؤر  إري  إبليس  أد  دّون  غورس  ميدّن.  أمشيد  إنجح  أد  إسّبعد  شيگان  ن  ميدّن  ( إلين  ديگسن  إمازيغن)  خف  واوال  ن  ربي  حما  أد  ور  أمنّ  ديگس.  إسّبعتّن  خف  لشتاب  ن  ربي  غاس  س  يون  واوال  "إتّوژوّر".  أر  تعاوادن  ميدّن  بلا  أد  نژون  إس  إصحا  ماد  أراح. لا  إتّيني  سيدنا  عيسى:  « س  تيتّ  أون  تّينيخ،  واخّا  إتكّس  إگـنّا  د  واشال  ؤر  إزلّا  أگّد  يوك  ن  لحرف  نغد  يوت  ن  تـنـقّـيطّ  زگ  شّريعا  أل  إشمّل  كولشي »  (متّى  5: 18). أر  إتّيني  ألتو:  « توكْسا  ن  إگـنّأ  د  واشال  توهن  خف  توكسّا  ن  يوت  ن  تـنـقّـيط  زگ  شّريعا »  (لوقا  16: 17). أد  ور  تّادجا  أ  وْما  أعداو  نّش  أش  إسّحرم  زگ  واوال  ن  ؤنّاش  إران  ألّيگ  يوشا  تودرت  نس تانيلا  نش.  يوف  مش  تقرات  نغد  سَّغداس  حما  أ  تعلوت  مايد  إلّان  قبل  أ  تَّحْشَمْت. بلا  أوال  ن  ربي  أرسلي  ؤر  إتّيغييْ  أگّد  يوك  أد  ييسين  لا  ربي  وَلا  أبريد  نّا  إتّاوين  غورس.

ماتّا نتّا سيدنا عيسى لمسيح؟

سيدنا  عيسى  لمسيح  أوال  ن  ربّي  أيد  إگا.  إكّا  د  ربي  زگ  تيزويري  (يوحنّا  1: 1 ـ 2).   ؤردجين  إكّي  ربي  بلا  أوال  نس  وَلا  رّوح  نس،  ماد  أراح؟  أوال  ن  ربي  غورس  تانباط ّ  أم  ربي.  أم  واوال  ن  ؤگـلّيد  غورس  تانباط  أم  ؤگـلّيدنّا.  سيدي  ربي  أگـلّيد  إگلدان  أيد  إگا.  أوال  نس  أس  إخلق  كولشي  نّا  إلّان  گ  دّونيت.  قّاح  أينّا  إگا  ربي  إگات  س  واوال  نس  إ  واوال  نس  (تبرات  ن  كولوسّي  1: 16). إسم  ن  عيسى  لا  إتعنو  ؤنّا  إتفوكّون  ميدّن  زگ  دنوب  نسن  (متّى  1: 21). أوال  ن  لمسيح  لا  إتعنو  ؤنّا  إتّودْهن  س  زّيت،  إدّخ  تاد  أيد  إگان  لعادا  ن  لوقتـنّا  إ  ؤنّا  إتّوستين  نغد  ؤنّا  إتّوختار  أد  إگ  يوت  ن  لخدمت. ماني  ؤنّا  إختار  ربي  حما  أدّ   إدّو  أد  إشمّل  تاگوريـياد  تاكسوات  نّا  إگان  أفوكّو  أخاتار  ن  ربي؟  ربي  إختار  أوال  نس  نّاگ  يومن  س  تيتّ  إس  إدّا  أد  إگ  أينّاس  إنّا. أمشيد  أيد  إدّا  غورخ  واوال  ن  ربي  گ  دّات  أم  تينخ  بلا  دنوب  حما  أد  إفوكّو  إمعصيتن  أم  نكّ  د  شگّ  أ  وْما.  أ  ياعريت  إ  ؤنّا  يومنّ  ديگس  إدّخ  ؤسار  إنّي  أد  إنگراز  (تبرات  ن  روما  9: 33). كو  يوك  زيگنخ  لا  إتّيري  أوال  نس  د  واراو  نس  ؤگار  ن  شا  ياضن،  أگّد  لبهايم  لا  تگـّان  إمشي  د  إفراخ  نسن.  ربي  لا  إتّيري  أوال  نس  أليگ  أس  يوشا  إسم  ن  ممّيس  ن  ربي.  لا  إتّيني  لشتاب  إقدّسن:  « د  نتّا  إسول  لا  إساوال،  هان  يوك  إسيگنو  إسّادّن  إدلاسن.  شا  ن  شوي  هان  يوت  صّوت  إدّاد  زگ  إسيگنو  لا  إتّيني:  واد  أيد  إگان  ممّي  نّا  إعزّن  غيفي  ديگس  أي  گيخ  تايري  نو.  نتّا  أمي  تسّغادم »  (متّى  17: 5).  سيدي  ربي  إدحّا  غيفنخ  س  شا  يوك  نّا  إغلان  غورس.  أياد  أساخ  إلازم  أ  نتواضع   داتاس  أها  نقبل  لهديـيْـت  نس  تاكسوات،  سيدنا  عيسى  لمسيح. سّغد  إ  لباراميج  ن  رّاديو  س  تمازيغت  گ  لانتيرنيت : « ماتـّا  نتـّا  لمسيح؟ 1 »  « ماتـّا  نتـّا  لمسيح؟ 2 ». سَّغد إ إزلي:  أ يَـسـوع لـْـمَـسـيـح أيا وا شَـگّ أگـّان. فرّج لفيلم "تودرت ن سيدنا عيسى" :

ماي دا إتعنو ممّيس ن ربّي؟

گ  تاضا  توجديت   زگ   لشتاب  إقدّسن  گ  لإنجيل  ن  يوحنّا  لا  إتّيني  ربي:  « داي  رارين  ووداين  إ  سيدنا  عيسى  نّاناس:  ؤر  نري  شا  أش  نرجم  خف  شا  ن  ؤسكّين  إژيلّ،  ماشا  خف  لكوفر  نش،  لا  تّگـّات  إخف  نش  د  ربي  د  شگ  غاس  أرياز  أي  تگيت »  (يوحنّا  10: 33).  أياد  لاخ  إتنعو  إس  فهمن  ووداين  مايد  إگان  ممّيس  ن  ربي.  فهمن  مزيان  أنغميس  ن  لمسيح.  زگ  تانيلا  نسن  ممّيس  ن  ربي  لا  إتعنو  ربي  س  إخف  نس.  ماشي  أم  ؤينّا  تخمّامن  ييتس  ن  ميدّن  ياضن.  ربي  ؤر  إحدادجا  تمطّوط ّ  گ  تودرت  نس.  ؤنّا  إتّينين  أياد  هات  ؤر  إسّـين  أگّد  إميل  خف  ربي  تباركا  وَ  تَعالى. أر  نتّافا  ألتو  گ  لشتاب  ن  يوحنّا  « أگّد  يوك  ؤردجين  يانّاي  ربي.  ممّيس  أفردي،  نّا  إلّان  گ  وول  ن إبّاس،  نتّا  أخت  إنعتن »  (يوحنّا  1: 18).  أياد  لاخ  إتّيني  س  تيتّ  ماتّا  نتّا  لمسيح،  نتّا  أيد  إغـييْن  إويل  نس  أد  إنعت  أها  إسضهر  ربي  گ  دّونيت  إ  ميدّن.  أگّد  يوك  ؤر  إتّيغييْ  أد  إگ  لخدمتاد  غاس  ربي  س  إخف  نس. نتّا  أيد  إغـييْن  أد  إمّت  نّيگ  ن  صَّليب  (إسيگـل)  حما  أد  إغفر  دّنوب  ن  ميدّن  كول  أها  إكّر  زگ  لموت. سّغد  إ  لباراميج  ن  رّاديو  س  تمازيغت  گ  لانتيرنيت : تودرت  ن  لمسيح 1 , تودرت  ن  لمسيح 2  ,  تودرت  ن  لمسيح 3 د إسماون  ن  لمسيح . سَّغد إ إزلي: يسوع أگـّان ربّي. فرّج س لموسيقى:

مايد إگان صّـليب نغد إسيگـل؟

صّـليب  نغد  إسيگـل  سين  ن  إعمدان  نّا  إجمعن  گ  وامّاس  لا  تّاگـلّ  ديگس  إمُجرِمن  حما  أتّن  نغن.  سيدنا  عيسى  إمّوت  نّيگ  ن  صّـليب  حما  أداخ  إسغ  س  إدامّن  نس  (تبرات  ن  غَلاطِيا 3: 13).  إمّوت  گ  وانسا  نخ.  نوكني  أيد  إستاهلّ  لموت  إدّخ  نعصا  ربي. صّـليب  غاس  رّمز  أيد  إگا  إ  ؤفوكّو  ن  لمسيح،  ديگس  أيد  إنعت  ربي  لقُـوّا  نس  د  تايري  نس  إ  ميدّن  كول  (تبرات  تمزواروت  ن  كورِنتوس  1: 18).  سيدنا  عيسى  إسغاياخ  زگ  لّعنت  ن  شّريعا  ألّيگ  يوسي  لّعنت  نخ  نّيگ  ن  صّـليب  (تبرات  ن  غَلاطِيا  3: 13). نوكني  إمومنّ  إمسيحين  ؤر  دا  نتّعباد  شا  صّـليب  ماشا  ؤنّا  إمّوتن  نّيگ  ن  صّـليب  تانيلا  نو  د  تانيلا  نش  أ  وْما  د  تانيلا  نم  أ  وْلتما. سَّغد إ إزلي: گ صّليب.

إس إمّوت س تيتّ سيدنا عيسى نّيگ ن صّـليب؟

س  تيتّ  أ  وْما  لمسيح  إموت  نّيگ  ن  صّـليـب ( نغد  إسيگـل).  أگّد  وينّات  إنغان  لا  تشاهادن  خف  دّنوب  نسن.  لا  إتّيني  لشتاب  إقدّسن  « داي  إراراس  كول  شّعب:  إدامّن  نس  أد  تّوتّين  غيفنخ  نوكني  د  واراو  نخ »  (متّى  27: 25). « بيلاطُس  يارو  تيرّا  نيگ  ن  صّـليـب  إگا  ديگسنت:  عيسى  ن  ناصِرا،  أگـلّيد  ن  ووداين »  (يوحنّا  19: 19).  أمحضار  نس  نّات  إزنزان،  إموت  أگّد  نتّا  إنغا  إخف  نس:  «  يهودا  إگرا  س  لفلوس  گ  تيمزگيدا  إفّغ  إدّو  إنغ  إخف  نس »  (متّى  27: 5). ؤداين  د  لعسكر  إرومين  سّنَن  إس  سيدنا  عيسى  لمسيح  أيد  إلّان  نيگ  ن  صّـليـب  ماشي  شا  ن  يوك  ضنين  ( لوقا  23: 36،  يوحنّا  23:19).  د  وينّا  إعيشن  أگيدس  أم  إمّاس  مريم  د  إمحضارّ  نس  سنن  أگّد  نيتني  إد  ؤنّا  إغلان  غورسن  أيد  إلّان  نيگ  ن  صّـليـب.  لا  إتّيني  لشتاب  « ألّيگ  يانّاي  سيدنا  عيسى  إمّاس  مريم  تاما  ن  ؤمحضار  نّا  دا  إتّيري،  داي  إنّاياس  إ  إمّاس:  هان  ممّيم »  (يوحنّا  19: 26). لشتاب  ن  تاضا  تاقديمت  إعمّر  شيگان  س  لايات  نّا  إساوالّ  خف  لموت  ن  لمسيح.  إد  گ  لشتاب  ن  تاضا  توجديت  لموت  ن  لمسيح  أيد إگان  لـْساس  ن  ؤنغميس  إسّفراحن  نّاخد  ييوي. ماشي  إمومنّ  إمسيحين  أيد  إران  أد  نغين  لمسيح،  نتّا  أيد  يودجان  ميدّن  أت  سمّرن  نّيگ  ن  صّـليـب  تانيلا  ن  دّنوب  ن  ميدّن  كول. سيدنا  عيسى  أگّد  نتّا  إسيول  خف  لموت  نس  د  تانشرا  نس  شيگان  ن  تيكّال  أل  ؤسّان  إنگـّورا  دات  ن  مايد  إتـْيومژ.  إنّاياسن  إ  إمحضارّ  نس:  « ها  نوكني  ندّا  أ  نّالي  غر  لقُدس،  أها  إتّوسلّم  ممّيس  ن  بنادم  إ  إخاتارّ  ن  إنَبْدادن  د  إسلمادن  ن  شّـريعا،  أها  نغينت »  (متّى  20: 18).  « لا  تيسينم  إس  لفِصْح  أد  ييلي  گ  سين  ووسّان  نّاد  إدّان.  ممّيس  ن  بنادم  إدّا  أد  إتّوسلّم  حما  أد  إتْواگـل »  (متّى  26: 22). سّغد  إ  لباراميج  ن  رّاديو  س  تمازيغت  گ  لانتيرنيت : مايد  إگا  لمسيح  نـّيگ  ن  واشال؟ فرّج لافلاما خف لموت ن سيدنا عيسى:

إس إكّر س تيتّ لمسيح زگ لموت؟

تانشرا  ن  لمسيح  زگ  لموت  أيد  إگان  يوت  ن  لمجريت  نّا  إگـلّبن  دّونيت  أها  إبدّل  تّاريخ  أبدا.  أيّه،  أ  وْما،  س  تيت  لمسيح  إكّر  زگ  لموت  گ  واسّ  ويس  شراض  ضارت  ن  لموت  نس  أمشينّا  إنّا  شيگان  ن  تيكّال  د  وامشينّا  إتْوارون  گ  لشتاب  إقدّسن  (متّى  27: 62 ـ 63،  لوقا  24: 13 ـ 27).  « إدّخ  أمشينّاد  تدّا  لموت  س  يون  ؤرياز،  تدّاد  تانشرا  زگ  لموت  س  يون  ؤرياز.  أمشي  دا  تـّمتاتن  ميدّن  گ  أدم  أد  يديرّ  كول  نسن  گ  لمسيح »  (تبرات  تمزواروت  ن  كورِنْتوس  15: 21 ـ 22). تينضلت  ن  لمسيح  إخوان  لا  تشاهاد  ألتو  خف  تانشرا  نس  زگ  لموت  ( لوقا  24: 1 ـ3،  لوقا  24: 13 ـ 27).  ألّيگ  إضهر  إ  إمحضارّ  نس  شيگان  ن  تيكّال  ( لوقا  24: 36،  يوحنّا  20: 19)،  عاد  أي  أغولن  بورزن  حما  أد  أسين   تاشعالت  ن  لإنجيل  أها  زلّعن  إنغميسن  إسّفراحن  واخّا  تكّا  غيفسن  شيگان  ن  تمارا.  شيگان  زيگسن  تّوعدّبن،  ويياض  مّوتن  خف  ليمان  نسن  أم  شيگان  ن  إد  لولوف  ن  ويياض  نّاد  إدّان  ضاراسن. قبل  أد  إزْري  لمسيح  إمحضارّ  نس  حما  أد  يالي  غر  إگـنّا  يودجاياسند  يوت  ن  لوصيت  تاكسوات  إنّاسن:  « أشّمات  گات  إمحضارّ  زگ  مايد  إگان  تقبيلت،  تغطّسمتن  س  إسم  ن  إبّا،  د  ممّيس  د  رّوح  إقـَدّسن »  (متّى  28: 19). فرّج لافلاما :

مايد إݣان أغطّس (أعمّد نغد لمعموديا)؟

لا  تّينين  إمازيغن  إغطّس  ݣ  وامان  زعما  إكشم  دّاو  ن  وامان.  إد  أغطّس  ݣ  لشتاب  إقدّسن  لا  إتعنو  يوك  ن  تاضا  ن  ؤمومن  د  لمسيح  دات  ن  ميدّن.  لا  إتّنعات  ؤمومن  إ  ميدّن  إس  إمّوت  أها  إكّر  د  لمسيح  (تبرات  ن  روما  6: 3، 4؛  تبرات  ن  كولوسّي  2: 12). ييلي  ألتو  ؤغطّس  ن  رّوح  إقَدّسن  ( نغد  رّوح  لقُـدُس):  رّوح  ن  ربي  لا  إزدّغ  ݣ  ؤمومن  نّا  يومنّ  ݣ  لمسيح  ݣ  تالاليت  توجديتّ  (تبرات  ن  غَلاطِيا  4: 6،  تبرات  ن  أفَسُس  1: 13، 14).

مايد إگان تلاليت توجديتّ ؟

تاد  أيد  إگان  لخدمت  ن  رّوح  إقـَدّسن  ( نغد  رّوح  لقـُدُس)  نّا  دا  إتگّا  گ  ؤمومن  حما  أد  ياغول  أد  إشور  گ  طّبيعت  ن  ربّي  د  تودرت  ن  لمسيح.  س  تلاليت  توجديت  بنادم  لا  إتّيلي  غورس  تودرت  توجديت  أها  ياغول  إگا  لخليقت  توجديت  أمشينّا  إتّيني  لشتاب  إقدّسن:  « مش  إلّا  شا  ن  يوك  گ  لمسيح،  هاتين  لخليقت  توجديت  أيد  إگا.  إسكّينّ  إقديمن  زرين  هان  كولشي  ياغول  إگا  ؤجديد »  (تبرات  تيس  سنات  ن  كورِنْتوس  5: 17). ألّيگ  إعصا  أدم  ربي   كشمن  دّنوب  گ  دّونيت  تاغول  طّبيعت  ن  بنادم  تگا  تمُدنِبت.  لمسيح  إسّفهماس  إ  يوك  ؤرياز  گ  لشتاب  ن  يوحنّا  أمور  ويس  شراض  إس  أگّد  يوك  ؤر  إكشّم  غر  تاگـلّيتّ  ن  ربي  مش  ؤر  إلولي  د ؤجديد. لا  إتلالا  ؤمومن  س  وامان  د  رّوح.  أمان  لا سّيريدن  أر  سّـيزْديگن،  لا  تمتّالّ  أوال  ن  ربي  (تبرات  ن  أفَسُس  5: 26)  نّا  دا  ياكّان  تودرت  س  لقـُوّا  ن  روح  إقـَدّسن  أها  إنغ  إسكّينّ  ن  طبيعت  تقديمت  گ  بنادم.  روح  إقـَدّسن  لا  ياكـّا  إ  ؤمومن  يوت  ن  طبيعت  توجديت  نّاد  إتدّون  زگ  ربي  (تبرات  تمزواروت  ن  يـوحـنـّـا  9:3). فرّج لفيلم :

ماتّا نتّا رّوح لقـُدُس؟

روح  إقدّسن  نتّا  أيد  إگان  روح  ن  ربّي.  نتّا  س  إخف  نس  ربي  أيد  إگا.  ماشي  شا  ن  لملاك  أيد  إگا  نغد  شا  ن  لخليقت  ياضن.  ؤردجين  إكّي  ربي  بلا  روح  نس  أها  ؤر  إلّي  شا  ن  بطّو  إنگر  ربي  د  روح  نس:  « إدّخ  روح  لا  إتعالام  خف  كولشي  أگّد  مايد  إلّان  غر  جاج  ن  ربي.  ؤر  إلّي  ما  دا  إتّـيـسـيـن  مايد  إلّان  گ  جاج  يوك  غاس  روح  نس  نّا  إلّان  جاج  نس.  أمشيد  أگّد  يوك  ؤر  إسّـين  إسكّينّ  ن  ربي  غاس  روح  ن  ربي »  (تبرات  تمزواروت  ن  كورِنْتوس  2: 10 ـ 11). كو  أمومن  إلولا  زگ  روح  إقدّسن.  لا  إزدّغ  ديگس،  أها  تاغول  دّات  نس  تگا  تيمزگيدا  ن  روح  إقدّسن.  إتّوغـطّـس  أها  إتّورشم  س  روح  إقدّسن  (تبرات  تمزواروت  ن  كورِنْتوس  12:  13)  (تبرات  ن  أفَسُس  1: 13). مايد  إگا  لمسيح  نـّيگ  ن  واشال؟ سّغد  إ  لباراميج  ن  رّاديو  س  تمازيغت  گ  لانتيرنيت :    رّوح  إقدّسن 1  د  رّوح  إقدّسن 2. فرّج لفيلم :

مايد إگان تـّالوت إقـَدّسن؟

ربّي  د  واوال  نس  د  رّوح  نس  يوك  أيد  گان، سيدي  ربي  نّاغر  تلّا  تنباط ّ  ن  دّونيت. گ  تمسيحيت  واد  أيد  إگان  تّالوت:  ربي  إبّاتـنخ،  د  واوال  ن  ربي  سيدنا  عيسى  لمسيح  نّا  إتّوسمّان  ألتو  ممّيس  ن  ربي  (راعا  أسقسا  ويس  16.)  د  روح  ن  ربي  إگان  روح  إقـَدّسن. گ  لشتاب  إقدّسن  ؤر  إلّي  شا  ن  واوال  ن  تّالوت،  ماشان  إضهر  گ  شا  ن  إواليون  ن  تاضا  توجديتّ  أم  لوقت  نّاگ  إتّوغطّس  لمسيح  خف  ؤفوس  ن  يحيى  ممّيس  ن  زكريا  نغد  يوحنّا  إتغطّاسن:  « غاس  إتّوغطّس  لمسيح  إفّغد  زگ  وامان.  هان  إگنوان  رژمن  أها  يانّاي  روح  ن  ربي  إرسد  غيفس  أم  ؤتبير  أها  إسل  إ  يوك  ن  واوال  إدّاد  زگ  إگـنّا  لا  إتّيني:  واد  أيد  إگان  ممّي  نّا  إعزّن  غيفي  نتّا  أگ  گيخ  تايري  نو  كول »  (متّى  3: 16 ـ 17).

ميمش تگّاخ أد إسينخ إس توفوكّاخ ماد أراح؟

لا  إتّيني  لشتاب  إقدّسن:  « مش  تقرّات  س  ؤقمو  نش  س  مولانا  عيسى  أها  تامنت  س  وول  نش  إست  إسكّر  ربّي  زگ  إمتّين  هان  شگـّين  أ  تّفوكّوت »  (تبرات  ن  روما  10: 9). أر  إتّيني  ألتو:  « مش  إلـّا  شا  ن  يون  گ  لمسيح  هاتين  لخليقت  توجديت  أيد  إگا.  كول  إسكّين  إقديمن  زرين،  كولشي  ياغول  إگا  ؤجديد »  (تبرات  تيس  سنات  ن  كورِنْتوس  5: 17). أر  إتّيني  ربي  ألتو:  « ؤنّا  يومنّ  گ  ممّيس  ن  ربي  لا  تّيلي  غورس   شّهاتّ  گ  وول  نس.  إد  ؤنّا  ؤر  يومينّ،  ربي  لات  إتگـّا  د  بو  إحلّالّ  إدّخ  ؤر  دا  إتّامن  گ  شهات  ن  ربي  خف  ممّيس »  (تبرات  تمزواروت  ن  يوحنّا  5: 10). أفوكّو  (نغد  أفوكّا)  ماشي  غاس  شا  ن  ؤخمّيم  نغد  شا  ن  رّاي  أتّ  إتفور  بنادم  ماشان  يوك  ؤبدّل  د  ؤغـيّـر  نّا  دا  إجرّون  گ  وول  ن  ؤمومن  نّا  إتوبن  أدّاي  إملاقّاي  د  لمسيح.   أفوكّو  نتّا  أحرّر  ن  بنادم  إمعصي  أدّاي  إتوب  أها  يامن  گ  ضّحيت  ن  سيدنا  عيسى  نّيگ  ن  صّـليب. فرّج لفيلم :

مايد إݣان تّوبا نغد تّوبت؟

تّوبا  نتّات  أدّاي  يوشي  بنادم  س  دّنوب  نس  أها  إندم  غيفسن  إتواضع  دات  ن  ؤنّات  إخلقن.  أدّاي  إبدّل  بنادم  رّاي  نس  ؤر إژيلّ  حما  أد  ياغول  غر  سيدي  ربّي  أها  ياغول  غورس  يوك  ؤراعا  ؤجديد. لا  إتّيني  لشتاب  س  إمي  ن  ؤمحضار  ن  لمسيح:  « بشّرخ  س  ؤنغميس  ن  تّوبا  د  ؤعايد  غر  ربي  س  لفعايل  إژيلّ  ن  تّوبا،  بشّرخ  س  ؤنغميساد  إ  ميدّن  ݣ  دِمَـشق  د  وين  لقُدس  د  ليَهوديا  د  لݣنوس  ياضن »  (إسكّينّ  نّا  ݣان  إمازانّ  26: 20). « توبات  إوا  تاغولم  غر  سيدي  ربي  حما  أداون  تّـومحون  دنوب  نّون »  (إسكّينّ  نّا  ݣان  إمازانّ  3: 19). فرّج لفيلم:
فرّج لقيست نـّا إعاود سيدنا عيسى خف تـّوبا تارْسْليت:

مايد إݣان أغول نغد أعايد ن بنادم غر ربّي؟

حما  أد  ياغول  يوك  غر  ربي  لازم  أد  إبدّل  أبريد  نّا  يومژ.  أد  إبدّل  أبريد  نّا  إزلّان  س  ؤبريد  ن  ؤفوكّو  نّا  إعدل  ربي.  حما  أد  إكشم  يوك  غر  تگـلّيتّ  ن  إگـنّا  لازم  أد  إتوب  زگ  لمعصييات  نس  د  تودرت  نس  ؤر  إژيلّ.  لا  إتّيني  لمسيح:  « س  تيتّ  أون  تّينيخ  مش  ؤر  تاغولم  غر  ربي  أها  تگيم  أم  إشيرّان  ؤر  تكشّمّ  غر  تگـلّيتّ  ن  إگـنّا »  (متّى  18: 3). أعايد  غر  ربي  لا  إتفّور  تّوبا  حما  أداس  تّوغفرّ  إ  بنادم  دنوب  نس.  لا  إتّيني  لشتاب:  « توبات  إوا  تاغولم  غر  سيدي  ربي  حما  أداون  تّـومحون  دنوب  نّون »  (إسكّينّ  نّا  گان  إمازانّ  3: 19). سّغد  إ  لباراميج  ن  رّاديو  س  تمازيغت  گ  لانتيرنيت :     مايد  إلازمن   د  مايْ  دا  تگـّان  إمومنّ  إمسيحين 1 د مايد  إلازمن   د  مايْ  دا  تگـّان  إمومنّ  إمسيحين  2. فرّج لفيلم "لقيست ن راكـّا" خف ﺅعايْد غر ربّي :

مايد إگان تژالّيت؟

تژالّيت  نتّات  أدّاي  دا  إساوال  ؤمومن  د  ربّي.  يوت  ن  لعلاقا  ن  واوال  د  ؤسّغاد.  ماشي  شا  ن  لواجيب  نّا  إتگـّا  بنادم  س  إبدّي  د  ؤقّجديم  د  ؤعاود  ن  إواليون  گ  ييتس  ن  لاوقات،  ماشان  يوك  ؤسّمغور  س  بنادم  أدّاي  إكشم  أد  إمگراو  د  ربي  س  رّوح  نس  أك  ماني  لوقت  د  أك  مانيدا.  لا  إتّيني  لشتاب:  « ژّالات  ديما  ترزوم  سيدي  ربي  س  روح.  أد  ور  تبدّات  زگ  ؤينّا  أها  تژّاليم  تانيلا  ن  إمومنّ  كول  نسن »  (تبرات  ن  أفَسُس  6: 18). يوك  ن  واسّ  رزاناس  إمحضارّ  إ  لمسيح  أداسن  إلمّد  أد  ژّالين  داي  إنّاسن:  « أدّاي  ترام  أد  تژّاليم  إنيات:  أ  إبّاتنخ  نّا  إلّان  گ  إگـنّا  أد  إتّوقدّس  إسم  نش  أدّ  تدّو  تگـلّيتّ  نش  أها  ييلي  لخاضر  نش  نّيگ  ن  واشال  أم  إگـنّا.  ؤشاخ  عافاش  أغروم  نخ  أسّ  س  واسّ.  غفراخ  دّنوب  نخ  أمشيد  أ  نتَّـغـْفار  إ  ؤينّا  إدنبن  ديگنخ.  أد  وراخ  سّكجام  گ  شا  ن  ؤجرّب،  ماشان  حضوياخ  زگ  إبليس.  إدّخ  شّگ أغر  تلّا  تنباطّ  د  لقُـوّا  د  لعزّ  أبدا  ن  وابدا.  أمين »  (متّى  6: 9 ـ 13).  أمشيد  أي  تاغول  تژالّيت  أم  يوك  ؤمداشار  إنگر  ؤمومن  أمسيحي  د  ربي  إبّاس  نّا  إلّان  گ  إگـنّا  س  واوال  نغد  لّوغا  نّاس  يوشا. تژالّيت  يون  ؤمداشار  إدامن  إنگر  ؤمومن  د  إبّاس  ربي.  لا  إتّيني  لمسيح  گ  لإنجيل:  « أدّاي  دا  تژالّام  أد  ور  تگـّات  أم  لمُنافيقين  نّا  دا  إتژالّان  بدّان  گ  تمزگيدا  د  تْغَمْرين  ن  إبردان  حما  أتن  أنّاين  ميدّن.  س  تيتّ  أون  تّينيخ  ؤمژن  لاجر  نسن.  إد  شگ  أدّاي  دا  تژالّات  كشم  غر  لبيت  نش  تقّـنت  تيفلوت  أها  تژّالت  إ  إبّاش  نّا  إلّان  ديس.  نتّا  نّاش  إتّانّاين،  نتّا  أش  إتْواجابن »  (متّى  6: 5 ـ 6).

مايد إگان أژوم؟

أژوم  نتّا  أدّاي  إبعّد  بنادم  إ  ووتشي  د  وامان  (أسْتير  4 : 16 ؛ ؤفوغ  34: 28).  لا  إتكّس  ؤمومن  ؤتشي  إ  دّات  نس  حما  أد  ؤر  إگ  لخاضر  نس  نتّا  ماشا  أد  إخمّم  گ  لخاضر  ن  ربي.  أژوم  ماشي  أد  إتش  بنادم  گ  إض  حما  أد  ور  إتش  س  واسّ.  ؤنّا  إتّاژومن،  ماشي  حما  أد  إرزو  ؤتشي  غر  تدگـّات.  لا  إتّاژوم  ؤمومن  حما  أد  إقرّب  إ  ربي،  ماشي  إ  ميدّن. هان  مايد  إنّا  لمسيح  خف  ؤياد:  « أدّاي  تاژومَم  أد  ور  تقّـنت  إنير  نّون  أم  لمُنافيقين  نّا  إسَخسار  ؤدماون  نسن  حما  أد  نعتن  إ  ميدّن  إس  أژومن.  س  تيتّ  أون  تّينيخ  ؤمژن  لاجر  نسن.  إد  شگ  أدّاي  تاژومت،  دهن  إخف  نش  تسّيرتّ  ؤدم  نش  حما  ؤر  تَّضْهارت  إ  ميدّن  إس  تاژومت،  ماشا  إ  إبّاش  نّا  إسّن  مايد  إلّان  گ  وول  نش.  نتّا  اداش  إرار  إنگراتون »  (متّى 6: 16 ـ 18). داي إنّا ديخ ألتو لإنجيل:   داي إقّيس سيدنا عيسى لقيستاد إ وينّا دا تّينين گ إخفاون نسن هاتين منان أها أر تحقّارن وييّاض، إنّاياسن:  « دّان سين ن  إرگزن غر تدّارت ن ربّي حما أد ژّالين، يوك أفرّيسي د  وايْض أصنّاك. داي إبدّ ؤفرّيسي أر إتژالّا إنگراس د إخف نس أر إتّيني: « أ ربّي، داش تحمادخ إدّخ  ؤر گيخ إمعصي أم ميدّن ضنين نّا دا تّاشرنين، أر تغشّان، أر تفسادن، ؤلا گيخ أم ؤصنّاكاد. دا تّاژومخ سنات ن تيلمرّات گ  سّيمانا، أر تّكّسخ لعشور خف ؤينّا داد تّراراخ كول».  إد أصنّاك ، إبدّا گ تّيساع  ؤر إغي أود أد إهزّا أللّن نس غر إگنّا، أر إكّات إدمارّ نس أر إتّيني: « أ  ربّي رحميي، هاتين گيخ إمعصي! »  أداون إنيخ: هاتين أصنّاك أد إدّا غر تدّارت نس إرضا غيفس ربّي ، ؤريد أم ؤفرّيسي. إدّخ ؤنّا إسّمژيين إخف نس إدّا أد إتّوسخاتر إد ؤنّا إسخاترن إخف نس إدّا أد إتّوسّمژي » (لوقا 18: 9 ـ 14). سّغد  إ  لبرنامج  ن  رّاديو خف  ؤژوم نـا إگا لمسيح:  « أجرّب ن لمسيح ».

مايد إگان لكنيسا نغد لكنيست؟

لكنيست  نغد  أجمّوع  نغد  أگراو  نتّا  كول  إمومنّ  نّا  إسغا  لمسيح  س  إدامّن  نس  زگ  أ لّيگد  إرْس  رّوح  إقـَدّسن  گ  واسّ  ن  خمسين  أر  تاوادا  تيس  سنات  ن  لمسيح  حما  اد  ياوي  كول  وينّا  ييسّ  يومنّ  (متّى  16: 16 ـ 18؛ تبرات  ن  أفَسُس  2: 20 ـ 22). گ  لوقتاد  كول  لكنيست  تمسيحيت  لا  تجماع  كول  إمومنّ  إرسليتن  إتـْييسّن  غر  ربي  نّا إعيشن  گ  شا  ن  لوقت  نّيگ  ن  واشال  (تبرات  تيس  سنات  ن  تيموتاوُس  2: 19 ـ 21).  كول  أينّا  إلّا  ؤگراو  ن  إمومنّ،  لا  إتّوسمّا  لكنيست  ن  وانسانّا.  لكنيستاد  ايد  إگان  يون  طّرف  زگ  لكنيست  گ  دّونيت  كول  نّا  إگان  دات  ن  لمسيح  (تبرات  ن  أفَسُس  1: 1؛  تبرات  ن  فـيـلـِبّي  1: 1). لكنيست  ماشي  لباطيما  نغد  شا  ن  ؤمزدوغ  ياضن  ماشان  كول  إمومنّ  س  لمسيح  زگ  لموت  ن  لمسيح  أرد  ياغول.  ؤر تبني  غاس  س  إسلّيوَن  إدّرن  زعما  إمومن  إرسليتن  (تبرات  تمزواروت  ن  بُطرُس  2: 5؛  تبرات  ن  أفَسُس  2: 21 ـ 22). سّغد  إ  لباراميج  ن  رّاديو  س  تمازيغت  گ  لانتيرنيت : « لكنيست  (أگراوْ  ن  إمومنّ) » د « أزلـّع  ن  تمسيحيت  گ  دّونيت ». فرّج لفيلم "إسكـّينّ نـّا گان إمازانّ" خف تلاليت ن لـَكـْنيست :

إس إسول لمسيح أد ياغول غر نّيگ ن واشال؟

واد  أيد  إگان  رّجا  أكسوات  ن  إمومنّ  إرسليتن  س  لمسيح  (تبرات  ن  تيطُس  2: 13).  أدّ  إدّو  لمسيح  حما  أد  ياوي  إمومن  غر  تاما  نّس  (تبرات  تمزواروت  ن  تَسالونيكي  4: 17؛  تبرات  تمزواروت  ن  كورِنْتوس  15: 51 ـ 57). واد  أيد  إگان  رّجا  ن  إمومن  إرسليتن  گ  مايد  إگان  أنسيون  د  لاوقات.  أسّـنّا  أمي  دا  جّوجودن  إمومن  س  تامونت  نسن  د  ربي  د  ضّاعت  ن  واوال  نس.  رّجاياد  أداخ  ياكّان  لقُـوّا  د  ؤفراح  حما  أ  نّزّري  تمارا  ن  دّونيت  د  نوكني  لا  نتـْيونويْ  مولانا  نخ  أدّ  ياغول  غورنخ. رّجا  ن  بنادم  ؤر  ديگس  لامين  ماشي  أم  رّجا  أمسيحي  إصحان  إسّفراحن.  ربي  أيت  إقاولن،  ؤر  ديگس  تيحلّالّ.  إسول  أد  إجرو  ؤياد  غر  دات.  (تبرات  ن  روما  8: 24، 25). فرّج س لموسيقى: