تژالّيت نتّات أدّاي دا إساوال ؤمومن د ربّي. يوت ن لعلاقا ن واوال د ؤسّغاد. ماشي شا ن لواجيب نّا إتگـّا بنادم س إبدّي د ؤقّجديم د ؤعاود ن إواليون گ ييتس ن لاوقات، ماشان يوك ؤسّمغور س بنادم أدّاي إكشم أد إمگراو د ربي س رّوح نس أك ماني لوقت د أك مانيدا. لا إتّيني لشتاب: « ژّالات ديما ترزوم سيدي ربي س روح. أد ور تبدّات زگ ؤينّا أها تژّاليم تانيلا ن إمومنّ كول نسن » (تبرات ن أفَسُس 6: 18).
يوك ن واسّ رزاناس إمحضارّ إ لمسيح أداسن إلمّد أد ژّالين داي إنّاسن: « أدّاي ترام أد تژّاليم إنيات: أ إبّاتنخ نّا إلّان گ إگـنّا أد إتّوقدّس إسم نش أدّ تدّو تگـلّيتّ نش أها ييلي لخاضر نش نّيگ ن واشال أم إگـنّا. ؤشاخ عافاش أغروم نخ أسّ س واسّ. غفراخ دّنوب نخ أمشيد أ نتَّـغـْفار إ ؤينّا إدنبن ديگنخ. أد وراخ سّكجام گ شا ن ؤجرّب، ماشان حضوياخ زگ إبليس. إدّخ شّگ أغر تلّا تنباطّ د لقُـوّا د لعزّ أبدا ن وابدا. أمين » (متّى 6: 9 ـ 13). أمشيد أي تاغول تژالّيت أم يوك ؤمداشار إنگر ؤمومن أمسيحي د ربي إبّاس نّا إلّان گ إگـنّا س واوال نغد لّوغا نّاس يوشا.
تژالّيت يون ؤمداشار إدامن إنگر ؤمومن د إبّاس ربي. لا إتّيني لمسيح گ لإنجيل: « أدّاي دا تژالّام أد ور تگـّات أم لمُنافيقين نّا دا إتژالّان بدّان گ تمزگيدا د تْغَمْرين ن إبردان حما أتن أنّاين ميدّن. س تيتّ أون تّينيخ ؤمژن لاجر نسن. إد شگ أدّاي دا تژالّات كشم غر لبيت نش تقّـنت تيفلوت أها تژّالت إ إبّاش نّا إلّان ديس. نتّا نّاش إتّانّاين، نتّا أش إتْواجابن » (متّى 6: 5 ـ 6).