ثيبراتين ن ؤمازان بولوس إ إمومنّ ن ثمدينين ن أفاسوس د فيليبّي

أفاسوس ثكّا ثݣا يوث ن ثمدينث نّامي يمقّور وادّور. ثوساد خف يير ن لبحر ݣ ؤغلّوي ن ثمازيرث ن أسيا ثامژّيانث (توركيا دغي ). ئكّاتّيد ؤمازان بولوس ثيكّلث ثامزواروتّ ݣ ثوادا نس ثيسّ سناث نّاݣ أر ئتبرّاح س ئنغميسن ژيلنين (ئسكّين نّا ݣان ئمازانّ 18: 19ـ21). د ݣ ثوادا نس ثيسّ شراطّ (ئسكّين نّا ݣان ئمازانّ 19) ئقّيمانّ ديكس شراض ن ئسݣّاسن أر ئسّلماد أݣراو ن ئمومنّ نّا يسمون ديسّ. د لشثاب أد ݣ لعهد ؤجديد ( ثاضا ثوجديتّ) نّا غر ئلّا ييسم ن ثمدينث أد، نتّا ثابراتّ نّا ياري ؤمازان بولوس ئي ؤݣراو ن ئمومنّ نّا يلّان ديسّ.

ݣ ثبراتّ أد، داسن ئتقّيس بولوس، أراخ ئتقّيس أود نوكني، مايد ئݣا سيدنا عيسى غيفنخ د ميمش أيداخ ئرا أنيدير. أراخ ئسنعاث رّحمث ن ربّي، د ؤينّا يعوّل أد ئيݣ حما أد ئفوكّو ميدّن ن لݣنوس ن دّونيث س ماس ثلّا. أراخ ئسنعاث ألثو ميمش أيد ئخصّا أتّيلي ثامونتّ ئتݣر ن ميدّن ن ربّي، د ميمش أيد ئخصّا أنكّس لمعصيث أها نمنو داث ن ربّي. ئسيول بولوس ألثو ݣ ثبراتّ أد أود خف ميمش أيد ئخصّا ئي يرݣزن د ثوثمين نسن أد مييرين اها موقّارن ئنݣراتسن، د ميمش أيداخ ئخصّا أنيلي نوجد أننّال ثيثيوين ن ئبليس.

فيليبّي ثكّا ثݣا يوث ن ثمدينث نّا ستعمرن رّومان. ثوساد ݣ ؤژلماض ن ثمازيرث ن ماكيدونيا ( لْيونان دغي ). ݣ ثوادا نس ثيسّ سناث، ئسمون بولوس د ئسمونّ نس أݣراو ن ئمومنّ أمزوارو ݣ ثمازيرث ن ؤروبّا (ئسكّين نّا ݣان ئمازانّ 16 : 12 ـ 40 ). د لشثاب أد زݣ لعهد ؤجديد ( ثاضا ثوجديتّ) نّا غر ئلّا ييسم ن ثمدينث أد ن فيليبّي، نتّا ثابراتّ نّا ياري ؤمازان بولوس ئي وݣراو ن ئمومنّ ديسّ. ئرا أثن ئسنومّر خف ثرزّيفث نّاس ؤزنن، د خف ؤسعاون نّا ثسعاونن اد ئبرّح س ئنغميسن ژيلنين.

ݣ ثبراتّ أد داخ ئسّلماد ؤمازان بولوس ميمش أيداخ ئخصّا أنفرح، نحمد ئي ربّي أها ؤر نتّاسي أنزݣوم. ؤر نسخاثار س ئخخفاون نّخ مشان أنحاسب وييّاض ئيس أخ ؤفن أها نزّوور نّفع نسن خف وينّخ. أر نتّيسين ألثو ݣ ثبراتّ أد ميمش أي نّيزري لمسيح أنسا ن لعزّ يدّود غر دّونيث أد أها يضاع أود أد ئمّث خف ئحنيݣن ن ؤطّورق، د ؤفوكّا ؤر ئيد س لاعمال مشان س سيدنا عيسى لماسيح، د نوكني أيث ييݣنّا أيد نݣا.

مش تريد أد تقراد لشتوب كول س تمازيغت، نقـّر داها.

حما أ تسموتّيت لشتوب كول  س   م ب 3، نقّر دا (mp3-zip – 10 fichiers – 36 MO).